Félagsfundur 26.02 2010
Félagsfundur MBS 26.02 10 var sæmilega sóttur en tæplega 28% félagsmanna komust á fundinn, en vitað var um tvær jarðarfarir sem komu í veg fyrir að sumir félagsmanna kæmust á fundinn. Stjórnin útskýrði hvað fyrir henni vakti og dreifði gögnum á fundinn til kynningar, en þar var m.a lagt til að sem flestir félagsmenn sameinuðu krafta sína á einn eða annan veg til að vera betur í stakk búnir að bjóða í þau stórverkefni sem fyrirhuguð eru á svæðinu.
Í innleggi formanns kom fram að þetta sé ekki í fyrsta skipti sem við stöndum frammi fyrir því að verja verktöku hér á svæðinu og nefndi hann brautryðjandanna, þar sem ungir menn úr flestum iðngreinum stofnuðu Keflavíkurverktaka með þeim árangri að þeir náðu til sín verulega miklum verkefnum ofan girðingar á sínum tíma. Hér væri um varnarstarf að ræða ella yrðum við undir og horfðum á stórfyrirtækin utan svæðis leggja undir sig stærstu verkin, því yrðu menn nú að taka til hendinni og stofna sterkt félag eða samtök sem sameinaði krafta margra smærri verktaka á svæðinu.
Umræður urðu miklar á fundinum og tóku margir til máls. Niðurstaðan var sú að stjórninni var þakkað sitt framlag og beðin um að vinna málið áfram og reyna að ná til fleiri félagsmanna og boða til framhaldsfundar sem fyrst.
KK skráði.